बैतडीमा बसको ठक्करबाट महिलाको मृत्यु

बैतडी। दशरथचन्द नगरपालिका-१ गुरुखोला विद्यालय गेट नजिक सोमबार साँझ भएको सडक दुर्घटनामा एक महिलाको ज्यान गएको छ।

महाकाली यातायातको सु.प.प्र ०२००१ ख १०१७ नम्बरको बसले ठक्कर दिँदा सोही नगरपालिका-१ की भागरथी लुहारको घटनास्थलमै मृत्यु भएको जिल्ला प्रहरी कार्यालय बैतडीका डीएसपी दीपक रायले जानकारी दिए।

दुर्घटनापछि बसलाई प्रहरीले नियन्त्रणमा लिएको छ भने चालक पनि प्रहरी सम्पर्कमा रहेको जनाइएको छ।

घटनाप्रति आक्रोशित स्थानीयले राजमार्ग अवरुद्ध गर्दै चक्काजाम गरेका छन्। पीडित पक्षसँग छलफल गरी आवागमन सुचारु गर्ने प्रयास भइरहेको प्रहरीले जनाएको छ।