अछाममा झण्डा गाड्ने क्रममा करेन्ट लाग्दा एकको मृत्यु, पाँच घाइते

अछाम । अछामको बान्निगढी जयगढ गाउँपालिका–१ जयगढ बजारमा झण्डा गाड्ने क्रममा करेन्ट लाग्दा एक जनाको मृत्यु भएको छ भने पाँच जना घाइते भएका छन्।

कृष्ण जन्माष्टमीको अवसरमा लाग्ने मेलाको तयारीस्वरूप बर्दादेवी मन्दिर नजिक सार्वजनिक स्थलमा नेपाल राष्ट्रको झण्डा गाड्ने क्रममा फलामे डण्डा नजिकैको बिजुलीको तारमा छोइएपछि करेन्ट लागेको हो।

घटनामा मेल्लेख गाउँपालिका–७ नन्देगडा निवासी १६ वर्षीय रोहित साउद गम्भीर घाइते भई उपचारका क्रममा बयालपाटा प्रादेशिक अस्पतालमा मृत्यु भएको जिल्ला प्रहरी कार्यालय अछामका प्रमुख ओमप्रकाश खनालले जानकारी दिए।

घाइते हुनेमा बान्निगढी जयगढ–६ का १८ वर्षीय समीर शाह, १७ वर्षीय विनोद रावत, २० वर्षीय बम शाह, साँफेबगर नगरपालिका–४ मुगसैनका १६ वर्षीय लवशन सुनार र रामारोशन गाउँपालिका–६ भाटाकाटियाका १६ वर्षीय शमशेर साउद रहेका छन्। उनीहरूको बयालपाटा प्रादेशिक अस्पतालमा उपचार भइरहेको र सबैको अवस्था सामान्य रहेको प्रहरीले जनाएको छ।